Ek 'sir' ka jhooth

Lockdown mein main barahvi mein tha. Dekhta tha ki log internet se paise kama rahe hain, to ghar walon se computer maanga. Unhone dila diya. 2022 mein apne se dus saal bade ek partner ke saath online service ka kaam shuru kiya — main clients laata tha, wo kaam close karte the, aadha-aadha. Shuru mein bees-pachchees hazaar mahina. Aaj do-dhaai lakh mahina hai. Main abhi bais ka hua hoon.

Ek dost ne kaha paisa lagaya kar. Pehle stock, phir bola isme kuch nahi rakha, F&O mein aa. Pehle hafte hi do minute mein hazaar rupaye ka profit hua. Bas, dimaag mein baith gaya.

Mummy ne mana kiya tha — bolti thi ki jo kaam kar raha hai wahi theek hai, itni jaldi paise ki zaroorat nahi. Par mujhe paise ki value hi nahi pata thi. Bank mein padha paisa sirf ek number lagta tha.

2023 mein maine partner se jhooth bola. Bola ki ek sir hain jo account handle karenge, das lakh chahiye. Unhone dhaai lakh diye, maine dhaai lakh apne daale. Handle main hi kar raha tha. Do-teen hafte roz das-pandrah hazaar nikale, sab khush the. Phir expiry ka din aaya. Saade teen bajte-bajte pachaasi hazaar ka loss. Agle din mera exam tha aur mujhe kuch samajh hi nahi aa raha tha. Lag raha tha heart attack aa jaayega.

Maine bataya nahi. Aur jhooth bole, aur paise liye, client ka payment bhi usmein daal diya. Do-teen mahine mein baarah-terah lakh gaya. Jab unhone login details maang kar sab dekh liya to bole police case kar doonga. Wo aadmi mujhe chhote bhai ki tarah maanta tha.

Phir maine paanch percent mahine ke byaaj par uthaya — saade chaar lakh, sirf byaaj bees-pachchees hazaar mahina. Credit card se ATM se cash nikaal ke daala. Aur sabse ganda kaam ye kiya ki apni girlfriend se ek lakh liya. Das saal ka rishta tha. Usne bina soche de diya. Teen din mein wo bhi gaya. Un raaton mein main tez music laga ke rota tha taaki koi sune na.

March 2025 tak maine sabka paisa chuka diya, poora zero. Aur usi mahine phir dhaai lakh laga diya, chaar din mein khatam. Uske baad maine raaton-raat tay kiya ki ghar banwana shuru kar doonga, taaki paisa haath mein ruke hi nahi. Ghar sattar percent ban gaya hai.

Kul battis lakh gaya. Uske alawa business do saal down raha aur mummy ki tabiyat mere hi wajah se kharab hui.

Do-teen din pehle phir mann kiya tha. Maine rok liya. Par sach ye hai ki agar account mein zyada paisa pada reh jaaye to mujhe apne aap par bharosa nahi hai. Das-bees percent abhi bhi andar baitha hai.