Sau rupay ka pehla recharge

Main padhai ke liye ghar se door aayi thi. Graduation ka aakhri saal chal raha tha aur saath mein ek chhoti si naukri thi, barah terah hazaar mahina. Kharcha poora nahi padta tha, isliye main Instagram par extra kamai ke tareeke dhoondti rehti thi. Wahin ek ad aaya. Maine app download kiya, sau rupay daale kyunki utna hi minimum tha, aur pehli baar mein hi kuch jeet gayi.

Aviator khelti thi. Kabhi do hazaar ka din, kabhi paanch, kabhi barah hazaar tak. Mujhe laga naukri ki zaroorat hi kya hai. Maine naukri chhod di aur ghar par keh diya ki gaming se side income ho rahi hai.

Uske baad wahi hua jo sabke saath hota hai. Jeetna band, khelna chalu. Aviator samajh nahi aaya to Balloon khelne lagi, phir doosri site, phir 1Win. Ek baar maine pachees hazaar deposit kiye aur woh account mein dikhe hi nahi. Main office mein baithi thi, sar ghoomne laga, log mujhe hospital le gaye. Maine unhe pehle weakness bataya, phir sach bata diya, phir daant khaayi. Paisa do din baad aaya. Aate hi maine phir khel liya.

Jhooth ke bina yeh chal hi nahi sakta. Chacha se rent ke naam par paise liye. Doston se maa ki dawai ke naam par. Office ke ek senior se chhe hazaar. Do loan app se das aur chaudah hazaar. Bank khaata cyber cell ne freeze kar diya aur das hazaar usme atak gaye. Maa ko maine aadha sach bataya, unhone pachees hazaar bheje, aur main woh bhi khel gayi - yeh soch kar ki jeet ke sabka chuka doongi.

Kul milakar paanch lakh se upar ja chuka hai. Abhi assi hazaar ka karza sar par hai. Do teen dost mujhse baat nahi karte, ek ne saaf keh diya ki na dosti chahiye na paisa. Ek ladka jisse maine paise liye the roz phone karta hai, ghar aane ki dhamki deta hai, aur use pata hai ki main khelti hoon, isliye jo mann mein aata hai bol deta hai. Paise se zyada dar mujhe apni izzat ka lagta hai.

Papa ko aaj tak nahi pata. Unki tabiyat theek nahi rehti, kaam bhi chhoot chuka hai. Ghar ka bojh mujh par aana chahiye tha, aur main yeh kar rahi hoon.

Do mahine maine kuch nahi khela tha. Kal - bas kal hi - sat hazaar phir haar gayi. Exam sar par hain. Maine wada kiya hai ki ab nahi khelungi. Filhaal mere paas bas itna hi hai.