Behen ki chain ke paise

Hum log bahut gareeb hain. Ghar par do-teen bhainsein hain, unka doodh bech kar ghar chalta tha. Ek waqt ka khana ho jaata tha to doosre waqt ka pakka nahi hota tha. Papa bahar kaam karte the, Covid mein nikaal diye gaye.

Engineering ka bahut mann tha par ek lakh fees kahan se aati. Maine diploma kar liya, aur wahin se sab kharab hua. Room partner din bhar cricket dekhta tha aur paise lagata tha. Maine pucha to usne bata diya. Maine do sau daale, haar gaye. Ghar se mahine ke teen hazaar aate the, wo bhi usi mein jaane lage.

Do-do din bina khaye reh lete the, par match par paisa zaroor lagta tha. Kharche ke liye shaadiyon mein band bajaya, chhata pakad kar khada raha — dhai sau rupaye ek raat ke. Phir bar mein waiter ka kaam, barah ghante ki shift, teen sau rupaye. Room ke paas kai shaadi ke haal the; hum kapde pehen kar wahan khana kha aate the.

Mummy ne bhains ka bachcha bech kar meri doosre saal ki fees ke bees hazaar bheje. Maine alag account mein rakhe the. Room partner ne kabhi mera PIN dekh liya tha. Ek raat, jab main so raha tha, usne wo poora paisa seedha bookie ke number par daal diya aur haar gaya. Subah admission karane pahuncha to account khaali tha.

Sattarah company mein interview diya, ek mein bhi nahi hua. Meri class ke sabhi baaki bachchon ka placement ho gaya tha. Attharahvi mein hua — us din bhi interview ke saath-saath main match par paisa laga raha tha.

Naukri lagne ke baad gyaarah mahine maine ek bhi match nahi khela. Ghar chhe hazaar bhejta tha, sab settle ho gaya tha. Phir ek din dost ko Dream11 par lagate dekha, aur andar wo cheez jaag gayi.

Papa ab phir bahar hain, attharah hazaar mein mazdoori kar ke behen ki shaadi ka paisa jod rahe the. Unka purana number band hua to account se maine apna number judwa liya. Unke jode hue dhaai lakh maine teen-chaar mahine mein haar diye. Rishtedari se aaye assi hazaar bhi.

Ek mahine pehle papa ne sawa lakh bheja — shaadi mein das gram ki sone ki chain deni tay hui thi. Wo paisa unhone teen-chaar doston se maang kar joda tha. Main dukaan tak gaya, chain thodi mehngi pad rahi thi, maine li nahi. Us raat bees hazaar laga diye. Chaar-paanch din mein sab gaya.

Behen ki shaadi December mein hai. Ghar mein kisi ko nahi pata. Doston ka assi hazaar baaki hai, app loan ka sawa lakh. Sar bhaari rehta hai, raat bhar neend nahi aati. Kal bhi khela hai maine. Behen ne ghar bulaya tha, main dar ke maare nahi gaya.