Athara logon ka hisaab yaad nahi

Mera selection pehle hi attempt mein ho gaya tha. Ghar mein jashn tha — ladke ki sarkari naukri lag gayi. Aaj wahi log mera chehra nahi dekhna chahte.

Pehli baar 2019 mein khela tha, computer class ke ek dost ko dekh ke. Andar-bahar. Paanch sau, chhe sau. Koi khaas baat nahi thi.

Barbaadi document verification wale din shuru hui. Main dusre sheher gaya tha papers ke liye, wahi dost saath tha. Usne kaha ghar se paise mangwa le, bol dena verification mein lagte hain. Maine papa se tees hazaar mangwaye. Us raat ek match pe teeson hazaar daal diye. Subah tak khaata zero tha. Ghar wapas aane ke liye mujhe do hazaar aur udhaar lene pade.

Joining ke baad pehli salary aayi. Poori salary ek league ke session pe laga di. Har baar yes. Har baar do ya teen run se haar jaata tha.

Uske baad jo shuru hua uska ant nahi hai. Colony mein ek aadmi do parcent pe paise deta tha — teen lakh liye. Committee join ki. Credit card se rent ke naam pe cash nikala. Ek raat nashe mein maine do lakh ek match ke pandrahven over pe laga diye, phir bache hue do lakh bhi. Teen din kamre se bahar nahi nikla. Na khana, na duty.

Phir ek senior ne paanch lakh diye teen parcent pe. Woh maine ghoomne-firne mein aur hotelon mein uda diye. Phir casino shuru hua. Casino mein main kabhi jeeta hi nahi.

Sabse ganda kaam ye kiya. Mummy se jhooth bola ki promotion ke liye dhai lakh chahiye. Mummy gaon ke aurton ke samuh mein gayi aur sabse maang ke laayi. Woh dhai lakh maine raton-raat khatam kar diye. Chhe-saat mahine baad ghar ko pata chal gaya ki koi promotion hua hi nahi tha. Us din se ghar ke darwaze band hain. Ek saal ho gaya, main ghar nahi gaya.

Ek bhaisaab ke paas unke heart ke operation ke paise rakhe the. Maine gidgida ke unse ek lakh liye. Haar gaya. Jab unka operation aaya, main unke pairon mein pada tha. Baat ab bhi nahi hoti.

Ek bachpan ke dost se pachaas hazaar liye the. Uski behen ki sagai ikkis tareekh ko thi. Ikkis tareekh aayi aur maine phone uthana band kar diya. Sagai bhi ho gayi. Maine aaj tak usse baat nahi ki.

Athara-unnees log hain. Kiska kitna hai, ab mujhe yaad bhi nahi.

Ab meri salary ka UPI ek lene wale ke naam ho raha hai. Woh mujhe do-teen hazaar mahina kharcha dega. Pichhle birthday pe kisi ne mujhe wish nahi kiya. Sabko lagta hai main paise maang lunga.