Doosron ko rokta tha, khud doob gaya

Kabhi main woh aadmi tha jo doosron ko satte se rokta tha. Dost khelte the to main unhe baithha ke samjhata tha ki ismein kuch nahi rakha, yeh galat kaam hai. Bachpan mein hum IPL par shart lagate the, par us shart mein paisa nahi hota tha - haarne wala sabko chai samosa khila deta tha, bas itna.

Aath saal pehle main videsh kaam karne chala gaya. Shuru ke saalon mein maine kuch nahi khela. 2022 tak mere paas chaar lakh jama the aur main doston ko udhaar dene wala banda tha.

Phir ek IPL aaya. Aas paas sab khel rahe the, main bhi shauk mein lag gaya. Pehle dost ke through, phir kisi ne kaha ki apni ID le lo, beech wale ka das percent bach jayega. Pehli baar paanch hazaar daale. Bees din mein barah terah hazaar ban gaye. Phir maine poora ek hi match par laga diya aur poora chala gaya. Us season ke khatam hone tak main sattar assi hazaar ka karzdaar tha.

Cricket khatam hua to maine casino wale khel shuru kar diye, roulette. Ek din subah gyarah baje se baitha, aur teen bajte bajte account mein sawa lakh the. Dost ne kaha nikal le, kuch maine nikaala bhi. Kuch ghante baad main phir baitha tha. Pachanave, nabbe, assi, saath, aur zero. Ek hi baithak mein.

Uske baad jo tankhwah aati thi woh app mein jaati thi. Purana karza chukane ke liye naya karza. Ghar ka sona chaar saal giravi pada raha, main sirf byaaj bharta raha, aur do teen mahine pehle woh chhoot hi gaya, bik gaya. Bade bhai ne mere chakkar mein loan liya, uski EMI woh derh saal se bhar raha hai. Aaj mere upar bees pachees lakh ka karza hai. Byaaj jod ke jo main gawa chuka hoon woh chalis pachaas lakh baithta hai.

Teen din se maine kuch khaya nahi hai, sirf paani piya hai, taaki paisa bach jaye. Seene mein baayen taraf dard uthta hai, raat ko AC mein bhi paseene se bheeg jaata hoon, haath kaanpte hain. Biwi ne poocha bhi hai, maine kuch nahi bataya. Maa-baap se ab sirf haal chaal poochne bhar ki baat hoti hai, sharam ke maare. Beti ka school admission sirf paise ki wajah se late hua.

Chaar din pehle poori tankhwah, jo EMI ke liye rakhi thi, ek baithak mein chali gayi. Ab dobara haath nahi lagaunga - yeh maine pehle bhi kaha hai. Karza chukane mein chaar saal lagenge, agar iss baar sach mein na khela.